التلت الأسود فى العلم

بشوفك أجمل الأحلام
واشوفك برضه فى الكوابيس
يا ضحكة تنور الايام
وزحمة وخنقة فى الاتوبيس
وشمس تدفى ايامى
وحر بيحرق البشرة
بشوفك كل يوم نشرة
واخبارك متبسطنيش
انا كل اللى يبسطنى
تناولينى رغيف العيش
بحارب لجل اوصله
واعانى فيكى لجل اعيش
وانا معييش
تمن كفنى ولا التربة
ولا تذكرتى للغربة
بقت فيكى الحياة صعبة
يا واخدة وحالفة ما تديش
ومين يدى الأمل غيرك
سنين بحلم بتغييرك
جعان نفسى ادوق خيرك
ومهما اعمل تقولى مفيش
بموت م الحوجة والضيقة
بموت فى القطر بحريقة
قتلنى الفقر فى دويقة
واندهلك متلحقينيش
واموت فى اليوم متين مرة
واموت فيكى واموت بره
معاكى تمللى على المرة
وفى الحلوة متفتكريش
لامتى هتفضلى ف نومة
يا ظالمانى ومظلومة
رضولك تبقى محرومة
ياريت انتى اللى ما ترضيش

لـ محمد السيد