بريق عينيك

حاساك بعيد ..
حاسة البريق ف عينيك ..
بيهدا
بينطفى
شمس الحنين ف سمَاك ..
... بقسوة بتختفى
حتى المعانى بقِت بتهرب من حروفك
و الحلم بقى جوايا متلون بخوفك
و اقول هاسيبك ..
و بُكره قلبك هيناديك ..
ما انا أصلى عارفة ..
قلبى مش حيهون عليك ..
و استنى ترجع ..
و استنى تانى ..
ألقاك حبيبى لسٌاك بعيد ..
دا انا قلتلك ..
أنا أد إيه باحتاج وجودك ..
باحتاج حنانك ..
ضحكتك ..
و أمان وعودك ..
بقى تبقى عارف إن قلبى ..
من لهفته هيموت عليك ..
و ان الحياة متعلقة ..
على نظرة بالمحها ف عينيك ...
و انك حبيب عُمرى الوحيد ..
و يهون عليك تفضل بعيد ؟؟؟

لـ دعاء عبد الوهاب
♥ ♥