كلمتين يا مصر

كل عين تعشق حليوه .. وانتى حلوة ف كل عين
يا حبيبتى قلبى عاشق .. واسمحيلى بكلمتين
كلمتين يا مصر يمكن هما آخر كلمتين
حد ضامن يمشى آمن أو مآمن يمشى فين؟
---
شابه يا أم الشعر ليلى .. والجبين شق النهار
والعيون بحرين أمانى.. والخدود عسل ونار
واللوالى فى ابتسامتك .. يحكوا أسرار المحار
ياللى ساكنة القصر عالى .. إمتى يهنالى المزار
كلمينى يا صبية طال علي الإنتظار

كلمتين يا مصر يمكن هما آخر كلمتين
---
قصرك المسحور غيلانه .. أغبى من دود الغيطان
بعد مص الغصن لاخضر .. ينحتوا عضم العيدان
واللى خلا الأرض خضرا .. واللى خلا الدار أمان
عاش بجوعه ملو جوفه .. مات بخوفه م الغيلان
روح الغلبان ما قالشى .. عن شقى العمر اللى كان

كلمتين يا مصر يبقوا هما آخر كلمتين
---
آدى كلمة من عذابى قلتهالك
باقى كلمة من حنينى صنتهالك
فى الضلوع من دنيا ظالمة
كنت خايف يلمحوها
يقتلوها فى سكة ضلمة

شقشقت والنور بشاير .. زهرة الصبار يا سلمى
يا نسيم الشوق يا طاير .. خد لمصر الصبح كلمة
طول ما يبقى الركب ساير .. بالبصاير والعنين
يبقى ضامن يمشى آمن يبقى شايف يمشى فين

كلمتين يا مصر يمكن هما آخر كلمتين

لـ أحمد فؤاد نجم

الحان - نبيل لحود