التغريبة

طعم البعاد صبّار ..
والغربة ليل بهتان ..
ياقلبي يا موجوع ..
إياك تكون قلقان ..
لو طالت المسافات ..
...أنا والأمل أخوات ..
وتالتنا كان الليل ..
دانا ليا فيها النيل ..
وليها فيا الروح ..
ماختارتش إنى اروح ..
مانا جوعي كان كفران ..
ملعون ابوك يا طموح ..
أخرك تشوفلى كفيل ..
لكني مش قلقان ..
تذكرتي رايح جاي ..
أنا مش فى بلدي عويل ..
لكني مش بتشاف ..
زهرة سنينى عجاف ..
مع اني ليا عزيز ..
افتوني فى رؤياي ..
لموا الأماني ازاي ؟ ..
حطوها عالباسبور ..
أحلامي صبحت بور ..
ممنوع عليها الضي ..
لكني مش قلقان ..
تذكرتي رايح جاي ..
البعد عنك خوف ..
وأنا عالرجوع ملهوف ..
لكن هعود ازاي ..
ومكاني كله ضيوف ..
ياقلبي يا موجوع ..
يا آهه حاضنة دموع ..
حب البلد بيعيش ..
لما يموت الجوع ..
يا حضن بيساعني ..
واحتاجتله باعني ..
ساعة ما مد إيديه ..
شاور وودعني ..
لكني مش قلقان ..
تذكرتي رايح جاي ..