رمضان فى مصر مايتوصفش بكلمة ولا اتنين ..
رمضان فى مصر السيدة و سيدنا الحسين ..
ولمّة العيلة و عيلة العيلة و الأصحاب ..
يارب على رزقك فطرنا ليك كلنا صايمين ..
وفي كل شارع على الأقل في مائدة رحمن ..
...وماتلاقيش ابداً فقير بيبات فى ليلة جعان ..
إذا أذّن المغرب وناس لسه فى طريق البيت ..
هيوقفوهم ناس يحلفوا نفطر سوا يا جدعان ..
وصوت الحصري و المنشاوي و البنّا ..
دعاء جبريل يارب اوعدنا بالجنه ..
دروس حسّان مع الشعراوي والقرآن ..
بيتفسر قصادك معنى ورا معنى ..
ولمة الناس فى الجوامع فى صلاة تراويح ..
ودموع و رعشة خوف وتوبه نصوحة للرحمن ..
متجمعين و طمعانين يتقبلوا من التايبين ..
وبيبكوا مع كل آية رحمة فى القرآن ..
ولعب الكورة و التقسيم مع صحابنا وأحلى أجوان ..
وفرحة فى كل شارع باينه و الزينة و لمض رمضان ..
وفوانيس رايحه جايه يا حلّو هل الخير فى كل مكان ..
والسهره تحلي فى أحلي قعده عالفيشاوي فى الحسين ..
بعد القطايف و الكنافه و العرقسوس وقمر الدين ..
ومسحراتي يفوت يفوت يوماتي يصحصح النايمين ..
اصحي يا نايم .. وحد الدايم .. رمضان كريم ..
