رؤيتي - أحمد الشيخ

فين روح الثوره أول ما اتعملت .. فين الشغل .. فين الأفكار .. فين النضافه .. فين الرغبه فى العمل و بذل الجهد .. فين الروح اللى اكتسبناها أول ما حسينا اننا شمينا نفسنا .. فين حبنا لمصر .. فين الوحده اللى كلنا كنا حسينها أول ما الثوره حصلت .. فين الإتصالات والرسايل اللى كان مضمونها اخييييرا .. هم و انزااااح .. اخيرا عملناها .. فين جهود المصريين فى الداخل والخارج .. فين احلامنا لما كنا بنبعت لبعض رسايل... واحنا بره مصر .. ونشجع بعض اننا نشتري المنتج المصري .. مع انه فيه احسن منه بكتير .. بس كنا بنقول اشتري المصري و ساهم فى تقوية ونمو بلدك .. فين الناس اللى كانت فى التحرير ولما اتحقق المطلوب نضفوا مكانهم .. فين الأمل لما اتعملت ارقام كشف الفساد و الحالات الطارئه .. نفسى اعرف بجد كام اتصال حصل وكشف عن فاسد .. نفسى اعرف كام واحد بطل يدفع رشاوي .. بس ازاي ؟؟؟

مصر زى ماتكون كانت صندوق كبير من بره دهب ومرصع بأجمل الأحجار الكريمه .. لكن من جواه مافيش غير فتافيت سابها النظام القديم .. ولما النظام القديم انتهى .. اعتصامات و مطالب فئوية .. اللى عايز يزود مرتبه واللى عايز يطلع فى التليفزيون واللى عايز يظيط فى الزيطه و اللى عايز مكسب سياسى و اللى عايز يخربها ويقعد على تلها .. ولما فتحوا الصندوق .. مالقوش أى حاجه .. فاضى الصندوق ياحسره .. لكن عايزين قطع الدهب والأحجار الكريمه اللى متزين بيها الصندوق .. ولم يتبقى الآن سوى خشب متهالك عفى عليه الزمن .. وأيضا يريدون ان يقسموا قطع الخشب الباليه على انفسهم .. رحماكم بمصر