رؤيتي - أحمد الشيخ

حبيبتي ليه تعاتبيني

وقولتي الحب حرية

وشايفاني يا نور عيني

فى كل دقيقة شخصية

وبتوتر وانا زعلان

وبتنطط و انا فرحان

وطفل جميل بيضحكلك

وتاخدي الضحكه بالأحضان

أنا حنين و عارفاني

وبالغيره واحد تاني

باخد موقف و بتهور

وبستسلم لأحزاني

بداوي الجرح مش عارف

فى نور الصبح مش شايف

لكن شايفك و انا مغمض

ومش خايف اقول آسف

أنا بدايتك و أنا نهايتك

وروحي بشوفها فى مرايتك

أنا مجنون لكل عاشق

وبعشق حتى تكشيرتك

لمستي مشاعري من جوا

انا هوا و مش هوا

وهتغير عشان خاطرك

وحبك يديني القوة